काही सांगायचं होतं

'बदल' हा समाजाचा मूळ पाया आहे. म्हणूनच प्रत्येक क्षेत्रात कालांतराने बदल होणारच. त्यामुळे प्रत्येक क्षेत्रात काळानुरूप काही चांगले-वाईट परिणाम होणार; मात्र त्याबद्दल नाकं मुरडता कामा नयेत, असे मत सिनेअभिनेता अतुल कुलकर्णी यांनी येथे व्यक्त केले.

"राष्ट्रीय शिक्षण संस्थे'च्या स्वामी विवेकानंद विद्यामंदिर, विष्णूनगर शाखेच्या "माजी विद्यार्थी संघा'तर्फे घेण्यात आलेल्या "काही सांगायचं होतं...' या मुलाखतपर कार्यक्रमात ते बोलत होते. या वेळी अतुल कुलकर्णी आणि सिनेअभिनेत्री अमृता सुभाष यांची मुलाखत अमरेंद्र पटवर्धन यांनी घेतली.

या वेळी अमृता सुभाष यांनी "देवराई' आणि "वळू' चित्रपटातील काही प्रसंग कथन करून रसिकांना मंत्रमुग्ध केले. "राजकारण, समाजकारण आणि मराठी चित्रपटांची आजच्या काळातील अवस्था' या विषयावर अतुल यांनी आपली परखड मते व्यक्ती केली. राजकीय प्रगल्भता केवळ राजकारण्यांसाठीच नव्हे, तर जनतेसाठीदेखील आवश्‍यक आहे, असे त्यांनी नमूद केले.

या वेळी त्यांनी हिंदी आणि मराठी चित्रपटांत काम करताना आलेल्या अनुभवांचे कथन केले.

"अवघाचि संसार'मुळे प्रकाशझोतात आलेल्या अभिनेत्री अमृता सुभाष यांनी सध्यातरी ही मालिका बंद करण्याचा दिग्दर्शकाचा विचार नाही, असे सांगितले. केवळ प्रेक्षकांच्या पसंतीमुळे तीन वर्षे ही मालिका सुरू आहे, असे त्या म्हणाल्या. रसिकांच्या आग्रहाखातर अतुल कुलकर्णी यांनी "सरफरोशी की तमन्ना', तर अमृताने "पानिसा निर्मल हो मेरा मन' ही गाणी सादर करून रसिकांची मने जिंकली.

या कार्यक्रमाचे अध्यक्षस्थान आमदार संजय केळकर यांनी भूषविले. राष्ट्रीय शिक्षण संस्थेचे अध्यक्ष श्री. खर्डेकर, स्वामी विवेकानंद विद्यामंदिरच्या मुख्याध्यापिका दीपाली काळे उपस्थित होत्या.